الفصل الثاني

Milk – lait – chocolate – calories ..   احدق بالكوب مال الموكا الي قبالي و اقرا الي عليه و انا ناطر عبدالله يجي  ما ظلت اغنيه لفرقه روك ولا ماتل ولا هندي و لا انمي و لا حتى سبيستون ما سمعتها و الاخ واعدنا يلاقينا قبل ثلاث ساعات و كل شوي يدق يماطل بالجيه, يمي حمني يطقطق بتلفونه و ياكل كيك و يشرب جاي, ليه رايح كافيه اذا تبي تشرب جاي ليبتون! المكان كئيب  جدا و ما صرنا نسولف وايد مليون شئ يشغل اذهاننا, وين بنقدم؟ اي كليه؟ بتقبلنا او لا ؟ اذا ما قبلتنا وين بنقدم؟ في واسطه عشان انقبل؟ ناخذ بعثه؟ وين نروح؟ امي و ابوي شرايهم؟ مصاريفي بتصير على منو..

 هذا كله و امور ثانيه تخفى عني تمر بخاطر حمني و عبدالله, اجتمعنا اليوم عشان نبين شالي بيصير وين بنروح عشان نكون كلنا على علم ببعض.

جا عبدالله و اهو يعدل نظارته "حركه المثقفين لمن يرفعونها على خشمهم"

لوحت له و شافني, نزلت ايدي طمست بكيكه حمني الي يمي, تخرعت شنو اللي لامس ايدي, شلتها على طول لمن حسيت بالكريما جان يصفق كف ايدي جبهة حمني, نز و طاح تلفونه بكوب الجاي.

وجعتن توجع بنفسجيتك يالاثول تلفوني راح و انا اشتري كوسبلاي طرزان الله ياخذ شكلك بطاقتي الفيزا بتنباق الحين.

شكله ما انتبه لجبهته الملطخه كريما بنيه XD

:انت الاثول حاط كيكتك يم ايدي و اشلون تطيح تلفون بكوب جاي ايدك رفله "مسحت كفي بفالينته"

:تبي تتهاوش يا ابو كراتيه اسود تراني تربيه قرود

جا عبدالله و صفقنا على راسنا: القطاوه بدت هوشتها مبجر اليوم

حمني رد بغيض: جب انا مو قطو القطو ضعيف الجلب اقوى

رديت عليه  و انا اطالعه بنص عين و اضحك: هاهاها اعترااف منك بانك جلب

غمس عبدالله ايده بالكيكه وصفقنا على وجيهنا: الحين انجبو, تعادل الجني و القرد.

قمنا نضحك و حسيت انه من زمان ما ضحكنا على شيء سخيف جذي.

قعد يمنا و طلب طلبه المعتاد, موكا ساخن مع كيك سوفليه.

: دوتس هد كشه حمني, حمني لا تعض دوتس, شباب ابي انتباهكم لدقيقه.

لفينا عليه, تغير المود, عدلنا نفسنا و حمني مسح الكريما و نطالع بعبدالله

: شباب لازم اقول لكم انه الأمر الي بتسمعونه خارج عن ارادتي كليا و انا منقهر اكثر منكم.

ختم جملته و بدت التساؤلات براسنا, عدل جلسته و جتنا موجه توتر.

 بعد ما رشف من القهوه مالته تنهد و اكمل كلامه: راح انتقل للامارات, بعيش مع خوالي هناك, امي مو راضيه اضل بالديره عند ابوي.

جحظت عيوننا من الصدمه, كنا متوقعين شئ جذي بس مو الحين, تو الناس, وبعدين اهو مو صغير عشان امه تقرر حياته, لا, انا اعترض, بس انا منو عشان اعترض؟ التفتت لحمني لقيته مصدوم مثلي و القفشه واقفه عند فمه و طاحت اللقمه. ضحك عبدالله و كمل كلامه: لو الامر بايدي ماكان رحت اترككم ابد, بس شسوي ما بايدي اي شيء.

ختمها بابتسامه مصطنعه و نكس راسه للارض, ضم ايدينه لبعض و شد قبضته على ذراعه.

حمني: اهم خلاص لازم ينفصلون؟ بعدين انت شكو مو جاهل عشان تمشي ورا امرهم و اذا ما تبيك يم ابوك, و انا اوافقها الراي, تقدر تاجر شقه تسكن لحالك منت طفل صغير يحتاج الرعايه.

رديت على حمني: نسيت انه ما يقدر يهد امه و اهي بهالحاله؟ تحتاجه اكثر مننا, ان راحت بلحالها مع لولو منو الي بيهتم للثاني؟

صمت عم المكان ابو دقيقه, مر براسي صوره امه لما كنا نزورهم و احنا صغار, مرأه من وجهها تحس بالامان و ان الدنيا بخير كنت اتمنى تكون امي, بس للاسف لمن كبرت أنا, تاثرت اهي بالاشاعات و حاولت تمنع عبدالله انه يصاحبني, امه عندها مرض ما اظن ان اخوانها لهم مزاج يقعدون يمها او يهتمون فيها ان جتها النوبه, و بنتها اصغر من انها تستوعب مرض الصرع, و ابوهم طايح حظ قاسي و سوالفه  و خرابيطه ما تخلص, اهي تحتاجه, ليه نكون انانين؟ تذكرت لمن كنا بالمتوسط و كان عبدالله منهار بسبب ابوه و قسوته و الخرابيط الي يجيبها بنص الليل فكان احمد الله يرحمه يعرف انه في مشكله من عيونه, يجمعنا كلنا و يبدي بمقالبه و نكته و خفه دمه ليما يطلع عبدالله من الغلقه الي هو فيها, و مره عبدالله قال لنا " بفضل ابوي انا ممتاز بدراستي, كل ما اشوفه اخاف اني اكون مثله و الخوف يولد الرغبه بالنجاح و بفضل ربي احصد الي اتعب عشانه" .

عبدالله: ليش احس جننا  مطلقات او ارامل و قاعدين نندب حظنا؟  XD

نطق حمني و شدني من تفكيري و ذكرياتي: هههههه انزين عاد يا مطلقه, هااااا يا ويلك ان تزوجت و ما عزمتنا للعرس اطلع عنك اشاعه اقشر من الي يطلعها بو اشاعه على دوتس L  

عبدالله: ما راح اتزوج الا الي انت تخطبها لي ..

حمني: انت مو تحب وحده و كل سنه تطيح بحب جديد روح تزوج هالكوريه الي معجب فيها مادري الهنديه الي تحب تمثيلها XD

عبدالله: لا تتطنز عالكوريات و بعدين بريانكا جميله لا تنتقصها عشانها هندييه, و لا تذكرني بحبيبتي الكوريه يقولون بالاخبار انها انخطبت ياخي حتى اسمها ناسيه بس الزبده اني احبها و قلبي مكسور XD

علقت عليه: ماشاء الله عبدالله انت تمشي و تخق, الي يشوف شكلك ما يقول عندك هالجانب, وش رايك امارس طقوسي و أظبط الطلاسم و اجمع القرابين عشان اجمعك مع بريانكا بالحلال XD  

رد و هو يضحك: اول شئ شوف خشتك, انت منو يصدق انك دايم مفهي و داج و سرحان بخيالاتك و افكارك و تكلم نفسك و خبل, طبعا مدحه خبل مو ذمه, منو يصدق انك تحب سبيستون ؟ الي يشوفك يقول هذا مؤسس ديانه عبده الشيطان

Well said 3abood XD اهم من يشوفون البنفسجيه و ترجيتي و سواره حمني بيحكمون علي غلط

حمني: عبدالله الفلبينيه تبيك, انا مالي دخل.

جت الفلبينيه تمشي بغنج و تتمايل, عبدالله فها و قام يوسوس, شتبي مني ام عيون مشخطه " توك خاق هالكوريه الحين صارو عيون مشخطه " قلبه قام ينبض بصوت عالي من التوتر, الفلبينيه ناعمه و ضعيفه, لابسه تنوره سوده ضيقه قصيره و قميص ابيض باكمام طويله  و فيونكه عند الصدر و شعرها اسود مسويته ذيل الفرس, و بايدها دفتر, الاخ يحاسبها بترقمه XD

عبدالله: اكسكوزمي مي لوف كيبوب نو هارت تو "يعني بيقول انه يحب وحده كوريه و قلبه ما يتسع لحب ثاني بس ارتبك"

فلبينيه: مدام سير ديس از دا بيل

عبدالله: وت؟ هالشنب كله و تقولين لي مدام؟ اهرجي عربي نسيت الانقلش كله.

فلبينيه: سوفي مدام سير, هادا باتورا مال قوفي هادا مدام سير مناق يطلب جاي ليبتون ثلاثا دينار مأ قيقا قمسه دينار قولو سوا تمانيا دينار, هدا مدام مناق يطلب موقا قاقاو قاراميل بارد اتنين دينار روبا مأ قيقا كارامل سنيقر و ساندويش جيقين و قوقيز قولوه يساب يطلأ قمس تأس دينار مأ مدام سير اول يزي تلاتا اسرين دينار انتا مدام سير يطلب موقا هار مأ سوبليت قولو يزي اسرا دينار, قولو توتل يزي 33دك مدام سير مناك يقولي انتا يدبأ "اشرت على حمني"

حاولت اخفي ضحكتي ما قدرت و حمني يأشر لعبدالله بـ thumbs down  و يقول له you lose  بو نظارة.

عبدالله: هين حمنيوه انا اربيك, دوتس مارس هوايتك بالتكبيل اربطه لي و انا بتوطا فبطنه.

دفع عبدالله الحساب و اهو يتوعد بحمني لمن نطلع من الكافيه و يتوعد فيني لاني دايم اطلب زياده عن طاقتي, دخلو شله شباب من النسخ الي يحبها المجتمع, دشاديش و غتر, و طالعو لزاويتنا و عطونا هذيج النظره الي تقول انتو ليش موجودين بيننا؟ كانوا ربع شباب من الي ينقال عليهم "عيال يرفعون الراس" .. لبس حمني و عبدالله عادي بنطرون جينز و قميص مبكر و حمني بنطورن رياضي و فانيله خضرا مكتوب عليها monkey  بالازرق و على اكمامها خطين زرق, ليش يطالعونهم؟ او يمكن كانو يطالعوني !! لان لبسي غريب كأني بعيد هالوين و لابس لبس فرقه metal  و عقد السلاسل يحوط رقبتي و خاتم الجمجمه باصبعي و بنطروني من جانبه الايمن مزين بسلاسل فيها اشواك و يتدلى منها شكل جمجمه بقرون و حلق باذني و خصلتي بنفسجيه تبين من بعد ميل و ايدي فيها سواره حمني و لابس gloves  اسود  بكف ايدي اليسار .. اعتقد اني اشد الانتباه و عجبهم شكلي الشيطاني و بدو ينسجون عني بخيالاتهم احتمالات عديده.

حمني و عبدالله اندمجو بتلفوناتهم, الكافيه في نت مجاني فقامو يوفرون من خدمه النت مالتهم, و انا اكمل قهوتي و ارسم.

مكاننا كان بزايه و ورانا دريشه تطل على حديقه يم البحر مال الجون كنت مسند ظهري للطوفه  و حاط الكرسي بحيث ايدي اليمين تتسند على ظهر الكرسي, حمني على يساري و عبدالله على يميني, يمنا طاوله ثانيه بس محد فيها, مكاننا مرتفع شوي عن ارض المقهى, الشباب كانو بطاوله قبالنا فكل ما تعبت ايدي من الرسم ارخيت ظهري للطوفه و اطالعهم, حمني قام يدق رقبه و متحمس مع الغنيه و بدون ما ينتبه ايده حاشتني و خربطني هديت الكراس و قطيت القلم زهقت من الرسم و مالي خلق اعدل.

واحد منهم قام للفلبينيه ذاتها الي من شوي و قام يطلب, بس كان يتحرش فيها بنفس الوقت,

كانت معبسه و مادري شترد عليه و اهو تجرأ و مسك ايدينها و مادري شيقول بس اقدر اتكهن من الي سواه انه يتحرش و يبي شيء قليل حياء, وخرت الفلبينيه و نادت واحد من الي يشتغلون و جا مكانها و قام يناجر الدرباوي عالي سواه و الفلبينيه تولول و تبرطم. الله ياخذك سودت وجيهنا عند الاسيويه الحين بترد ديرتها و تذمنا و تذم ديننا و بيئتنا بسبتك, حسافه المجتمع متقبل اشكالك و ما يفكرون انه البلا من الي مثلك, شاطرين عالي مثلي.

طلعت تلفوني لقيت مسج بــ Gmail, ابتسمت و لا اراديا قلت: اخيرا

رفعت نظري لقيت حمني داخل بوجهي و يطالعني نص عين بابتسامه غبيه

 : بسم الله شفيك داخل بام اخلاقي

حمني: لا ابد بس احب اشوف شكلك لمن تصير خدودك حمر

نزل عبدالله السماعات: ها الحب؟

رديت عليه: صار لك ساعه تطقطق بالتلفون جنك تكتب مقال لمن حمني تكلم صرت تسمع و ترى و جالك الاهتمام المفاجئ كمل طقطقه بالتلفون احسن لك.

حمني: استحى استحى استحى كاااااك مثل البنات

رديت متنرفز: حمني ترا والله اهفك بالقلاص انثبر مكانك.

حمني: اسفين اسفين خلك مع الحب حقك.

فجأه قلبي امتلا بمشاعر مختلفه, شوق و فرح و محبه و كل شئ حلو, اخيه لو اقدر اعدي هالحواجز الي بيننا.

 و انا اكتب دخلت عايله للكافيه, ام اب و ابنهم الصغير, احطه ثمان تسع سنوات. الولد ينطنط جنه حمني لمن كان بعمره, الابو لابس بنطرون جينز اسود و قميص و كبوس, و الام مثل اغلب بنات الديره عبايه واسعه و شيله رمليه و نظارات. قعدو بمكان بعيد, المكان كان هادي و مافيه غيرنا و شله سروال و فنيله و واحد شايب اجنبي يقرا جريده بنهايه الكافيه و هالعايله الصغيره.

من الرسم بالفحم ايدي تلطخت تعاجزت اقوم اغسلها, قمت بتثاقل و وصيت الشباب على اغراضي, كان الحمام ورا الكاشير بابين للحريم و الرجاجيل, الباب يوديك لممر صغير بنهايته فتحه, فيه مغاسل و دورات مياه ثلاثه, واسع المكان. غسلت ايديني و دخل واحد من الدرباويه و قام يستظرف نفسه

: عفوا البويات و الجن*س مواهني مكانهم, مادري انت ايهو منهم بس اكيد هذا مو مكانك.. مكانج!!؟

التفتت له و انا اطالعه بنص عين باحتقار من فوق لتحت

اول مره اشوف واحد ياكل كيك مثل العيش, مو واصله لك ثقافه الشوكه؟

اوو لك لسان والله ههههه انا للحين مادري اخاطبك بنت ولا ولد!!

اغاظني, قربت منه و طالعت مباشر بعيونه: تبي تعرف؟ اوك خل أثبتك عالارض و اسويها معاك و بتكون الجانب الناعم من العلاقه المثليه, مثل كل الي يكونون معاي, راح تتأوه من الألم بس بسد حلجك عقب ما احكرك داخل هالمكان الضيق, عقبها بتعرف منو فينا  الرجال و منو الـ ****

قربت يم اذنه و نفخت, بعدت و عطيته ابتسامه تغيض. اقشعر بدنه و حك رقبته متقزز و طلع عالفور.

 بتسألوني ليش قلت جذي ادري, ان نكرت الاشاعات ما بيتغير شئ و بيظلون يغيضوني فيها, ليش ما استفيد منها دامني ما بقدر اغير رايهم, اخليهم ينقدون على روحهم و يبلعون العافيه و لا عاد يقربون, الموضوع يرفع ضغطي لانهم يصنفوني حسب هواهم فراح اوكلهم تبن مثل ما يغثوني.

 دخلت افرغ معدتي المليانه ثلاث اصناف اكل و كوب كبير الحجم موكا اكسترا شوكلت اكسترا كرامل. طلعت ولا القا الجاهل بو ثمان سنوات جدامي و واحد ثاني من الشله الجميله الي كلهم نسخ يمشي وراه, الجاهل ما يطول الحنفيه و ايده و كمه كان متسخ بالكريما البيضا, سوا نفسه الشهم النبيل بو سروال و فنيله: تبيني اساعدك بابا؟ تعال هباا, "شال الجاهل عشان يغسل ايدينه" و قال له: لازم نفصخ الفانيله عشان نغسلها زين بابا؟

ما اعرت الموضوع اي اهتمام يمكنه خوش واحد ما ودي اظلم او احكم غلط, بس لمن مشيت للباب بطلع سمعت الجاهل يتأوه و جنه يستنجد فيني, تسكر الباب وراي بس حسيت السالفه فيها شئ, الطفل شحلاته جميل و هالاشكال نفوسهم دنيئه جدا, رديت فتحت الباب و دخلت لقيت الحيوان الي تمشيه غرائزه يتحرش بالطفل!! رافع فانيلته و الجاهل يطالعني و يمد ايده و عيونه كلها دموع من الخرعه مو قادر يتكلم.

استشاط غضبي هالحقير شنو قاعد تسوي الله يلعن شكلك!!

طالعني: كمل طريجك  مالك شغل لا تكون مكانه يالـ خـ*ـيث

شال الجاهل متجه لباب الحمام, مشيت وراه و تليت الجاهل من ايدينه و طحت فيه ضرب, طلعته لعند المغاسل و قام يقاومني بس على منو على صاحب الحزام الاسود!!.

 لفيت ايدينه على ظهره و سدحته عالارض و مثبت راسه بالبلاط: يا الدنيء ياللي نفسك خبيثه تمشي ورا غرايزك طفل بريء مسكين تجره لهالطريج!! ما تخاف الله ما تخاف على اخوانك!! حسافه المجتمع متقبلكم و يشوفونكم ترفعون الراس و ينشد فيكم الظهر و اغلبكم بالظل جذي تصرفاته! خاف ربك يالي ما تخاف الله و يقولون عني انا المثلي الايمو الترانس, و انتو الكاملين.. الكمال لله, لو اموت ما انزل نفسي و اصير مثلكم, ولا ممكن انزل نفسي هالمره و اخليك تذوق الي كنت بتسويه للطفل!

يحاول يفلت بس ما قدر لفيته قبال وجهي و صار يطالعني بخوف,  يحاول يفلت بس قبضتي اقوى من محاولاته المستميته و رجوله ترفس بس رجولي اثقل منها, انا متقزز من الوضع و ممكن ارجع على وجهه الوسخ بس ابيه يذوق طعم الخوف الي الطفل ذاقه, مع ان الطفل رعبه كان اكبر, ضحكت بخبث و قلت له: ها شرايك؟ انا ما همني ان دخل احد سمعتي ملطخه اهم شئ عندي اجرك  للقاع معاي.

 دخل الي توني كنت متهاوش معاه و ابو الجاهل و الجاهل يبكي مرتعب, بين اثر احمر على جسم الطفل, الخبيث لمسه الله يحرقه. الدرباويه استانسو جنهم يقولون الحين بنردها لك يالايمو, و الطبعه الي على جسم الطفل خلت ابوه يستشيط غيض و شرار يطلع منه, من الي شافه يحاسب السبب كان انا! يالليييل وقتك غلط خلني افقع وجهه بالاول بعدين تعال =__=

جا ناحيتنا, وخرت عن الحقير و ركض لورا الابو و قام يمثل دور المسكين, الاب التفت لي و ولده لاسق برجوله: بابا مو هذا هذا ولد زين و حلو هذاك الي عوراني.

رد الاب: انت تسكت لمن اخلص شغلي هني, سكر الباب.

الدرباوي الاول سكر الباب و الدرباوي الثاني يم الاب و يطالعني بنضره المنتصر, الاب كان جثل و ضخم, اذا يعرف للكاراتيه انا بروح فيها. قرب مني و يمه السافل.

الاب جر السافل من دشداشته و حطه جدامي "جنه فيل ماسك فار" و قام يكلمني: لو سمحت اخوي ممكن تشرح لي بالضبط الي صار؟ شنو العلامه الي بجسم ولدي و ليه مو لابس فانيلته و ليه كان يبجي؟ اهو قال ابو دشداشه فصخ فالينتي عشان يغسلها بس  انا اعرف ان هالاشكال القذره تخفي دناءتها تحت لبسها الشعبي عشان الناس تتقبلها, و انا كلش ما ارتاح لهم ولا احبهم و من دخل ولدي الحمام و عيني عليه بس لانك كنت هناك كنت مرتاح من طلعت و ظل الولد لحاله و بعدين انت رديت و الولد طلع يبجي قلت يا قاتل يا مقتول.

شرحت له السالفه و فسرت ليه كنت فوق هالسافل, اهو تل الي تحرش بولده و انا تليت الثاني لبرا الكافيه و طحنا فيهم طق اليهود, جو حمني و عبدالله ركض اول ما شافوا لهوشه و لمن شافو الدم تحمسو و قامو يصفرون: ايوا دوتس اقضي عليه هالنسخه الحقيره, مع اني مادري شالسالفه.

تجمعو الناس و علا الازعاج و ربع هالاثنين خافو و نحاشو اول ما شافو ربعهم ينطقون,

شكرني ابو الولد عاللي سويته مع اني ما كنت انطر الشكر كنت اتصرف حسب الي اشوفه صح و اغلب الي سويته من حرقه قلبي.

الاب تل الحقير لقسم الشرطه و رفع قضيه تحرش بس بالواسطه فلت الحقير. شيء مضحك الجاني بالواسطه يصير مجني عليه و مسكين و ابو سروال و فنيله الي يتحرش بالاطفال بالخفيه و الظلام عقب فتره يتزوج و يجونه عيال و يرفع راس اهله لانه "نسخه" جميله مثل ما يبون, و الطفل المسكين يكبر و يتعقد و تصير عنده ميول مثليه و يكره نفسه و يحاول يتعدل  و يصير ملعون بسبب ذنب ما اقترفه ولا في اي حل يعالجه غير انه يموت قبل لا يعبر الخط. 

اكره مجتمعي المتخلف هذا ودي احرق كل الي جذي.

نسينا سالفه سفر عبدالله من الي صار, عقب ما رديت البيت هذاك اليوم كلمت الحب بالـ  Gmail  و قلت لها الي صار, كسر خاطرها الحادث و الطفل و قامت تدعي انه يعدي الصدمه بدون ما ينولد ميول ملعون, و اخر شئ تحمست كان ودها تكون هناك تشوفنا و احنا نتهاوش.

كنت منسدح عالسرير و انا اكلمها, راحت تنام تاخر الوقت, قمت بدلت ملابسي و لبست بجامه .. و كبوس المخروط الي نهايه كره فرو.. اتصل عبدالله و شبكنا بحمني يبون تقرير بحادث اليوم, و اخر شئ كلمنا عن السفره و انها عقب ثلاث ايام.

بعد ثلاث ايام عقبها ما بنشوف عبدالله ولا بنسمع صوته بيغيب لفتره طويله, ممكن طول حياته, بس عندنا النت و نقدر نسافر له ان ما أشغلتنا الدنيا. بشتاق له و بيشتاق لنا.. شلتنا المرحه خفت نورها و تفرقت, منو ظل؟ انا و حمني؟ او انا .. و حمني ؟

 عقب ثلاث ايام رحنا نودع عبود و شايلين معاه الجنط, سلمت علينا اخته لولو ام خمس سنوات, و امه شكرتنا عالعنوه. كنت مع حمني ...  و "هديل" <3  

 ودعناه و ركبناه الطياره القلب مكسور و الروح تعبانه, رديت البيت و قطيت نفسي عالسرير و غطيت بالنوم العميق بدون ما احس, كنت مرهق و تعبان بس ابي انام. 

 عبدالله سافر و حمني مشغول بحياته  و محاولاته بتحويل تخصصه معاي, اشوفه بكلاس واحد كل يومين, و الكليه رتيبه جدا و الاختبارات القصيره قربت تنتهي. لو ما حمني يمي و هديل كل يومين تتواصل معاي مادري شلون بعيش, خصوصا مع الاهل المتسامحين المحبين. امس امي فصلت علي و جا ابوي و شاركها المحاضره الي ما تتغير.

بدت السالفه من لعبه BJD شريتها, شخصيه لوسيفر من ringdoll  كنت ناطر الاصدار بأحر من جمر و نطرته ثلاث اشهر يالله وصلني و من الحماس فرشت سفرتي بالصاله و جبت السكين و قمت افتح الصندوق و أنا اطق رقبه. كانت امي يمي تطالع تلفزيون مسلسل خليجي هابط مثل اغلب مسلسلاتنا.

لوسيفر الجميل اول ما طلعته عطيته عناق بغت تتفكك اطرافه, كان بكحله سوده و على راسه اجنحه غراب و قرون, و لبسه جمييل جدا اسود مشابه لستايلي, شعره طويل و ملامحه جميله جدا.

شافته امي و قامت تضحك: ههه والله حاله كل ما نقول باجر بتعقل تزيد جنون شنوهالصنم الي جايبه؟

عبست و لفيت لها: هذا دميه شكو صنم و بعدين شوفي شحلاته و اطرافه تتحرك.

ردت و اهي تضحك: دميه!! يا فرحه امك فيك حط مثله مكياج و حمره, و تعصب و تقول اشاعات, اشاعات شنو يولدي شوف نفسك بالمنظره اي رجال يلبس جذي جنك رايح تجمع عبده الشيطان المثليين!!

استفزتني, جت على الوتر الحساس: مثلي مو مثلي, عابد ابليس امجد شياطين محد له دخل, مهما انكرت ما بتغيرون نظرتكم فما راح اتعب نفسي عشان اقنعكم بالعكس أهم شئ أنا عارف أنا شنو و ربي عارفني ما همني احد.

شلت دميتي بروح غرفتي, دخل ابوي البيت و شافني ماسك الدميه بايدي و اهي طولها اكثر من 60 سم.

امي: شوف ولدك شجايب, لعبه حق طقوسه هههههه مادري متى بييوز عن سوالفه. كل ما قلنا عقل طلع منجن اكثر

طالعني ابوي: يا ولدي لي متى بتظل جذي انت مستانس بحالك؟ مستانس ان الناس تقول عنك هالكلام؟ المشكله تصرفاتك ما تخلي الناس  تقدر تنكر, و نفتشل عند الأوادم لمن يجيبن طاريك.

امي: ايه ولد ابوه تحاسبه بيعتبر؟ جم سنه و انت تقول له هالجي و ما من فايده؟ بيظل جذي مختل.

صرخت: مختل مجنون مو صاحي كيفي انتو شتبون خلاص خلوني اعيش لي متا بتنغصون حياتي خلوني اعيش -كملت بهدوء-  يبا كم مره قلت كلمه الناس؟؟ طز بالناس يولون كلهم الله يحرقهم ما هموني ولا همني كلامهم, يا اكون نسخه عشان انحب او اكون نفسي و انكره؟

امي: لمصلحتك كل هذا بس انت حمار ما تفتهم.

رديت و انا اضحك و اخفي دموعي: شكرا يمه, عقب ما عورتي قلبي و اتهمتيني بالمثليه و بعباده ابليس و شياطينه و الكلام الي مثل الشوك, تقولين لمصلحتك؟ مشكوره ما ابيج تدورين مصلحتي اذا فيها طمس لنفسي و ذاتي.

شلت دميتي و رحت غرفتي و امي تتحلطم عند ابوي و مادري شيقولون ومابي ادري شيقولون.

دخلت غرفتي الفوضويه و صفقت الباب, جلست عالسرير مقابل للتلفزيون و الدريشه على يميني, فتحت الدريشه و دخل نسيم الهوا. فتحت التلفزيون, ابي اي فلم يطلعني من الي انا فيه. كانت على سبيستون و اغنيه كوكب افلام. اعتقد فلم مطر من نار او مسرح الحياه طلع لا هذا ولا ذاك, الفلم الي من راح جدي و انا كاره اشوفه

رمز السرور بسمات النور 
فيض الحب يملأ قلبي  جدي جدي قد علمني ان اصبر في وجه المحن 
و أنين الذكرى يدفعني يحي في قلبي الآمالا و الامل العذب سيلهمني ارسم لوحات و ظلالا

الاغنيه شدتني بعنف من الواقع للماضي البعيد جدا لمن كنت طفل صغير و كان جدي مدللني, كل ما شافني يحضني و يحبني و يدلعني و يقول اني احسن حفيد و انه بيصير لي اسم و صيت.. الله يرحمه, حتى لمن بدت شخصيتي تبين ما وقف ضدي مثل امي و كان دايم يعصب عليها و يقول, خلي الولد على مشتهاه دامه مو مسوي شيء حرام لا تحدينه عن نفسه. كنت استغرب من تقبله لي و عقب اذكر انه الله يرحمه رجال يعرف الله و ما تهمه المظاهر ولا العادات الي تحد و تقيدالحريه. كان حنون لدرجه محد يقدر يتخيلها حبيب لدرجه مستحيل تحصلون احد مثله, ليش امي مو مثله؟ مو اهي بنته؟ مو انا ولدها؟ ليش تسوي فيني جذي؟ احيانا تكون عاديه جدا و تسولف بشكل عادي بس ليه اغلب الوقت تفصل علي و تهزأني و تسمعني كلام يسم البدن, ليه ما نعيش اسره سعيده من اغلب البشر! ما استحق عايله تحبني و تحترمني؟ 
جدي اشتاق لك حيل, جدي ما اعرف اتصرف مع امي هي ليش مو مثلك؟  جدي ليه تركتي و رحت؟ و احمد لحقك و هدنا. 

حسيت بغصه وكلامي مع نفسي زاد الطين بله,  تداركت دمعتي, الله يرحمه له سنين من توفى بس للحين ان ذكرته او طريته قلبي يدمي. يريت اقدر اكون سعيد بحب اصحابي و بس, لكن احتاج حب امي و ابوي, احتاجهم يمي يحسون فيني و يحبوني يساندوني يفخرون فيني ليش انا مو ولدهم الوحيد؟  جدي كان مغطي هالجانب و بزياده. اخيه يحلو الطفوله و من تكبر ينقلب من يحبك و تصير الذكريات مجرد صور من ماضي بعيد. 

اتصلت هـديـل و ارتسمت على وجهي ابتسامه, نسيت الهوشه الي تو, مزاجي تغير بسرعه كأن الاسم لحاله انتشلني من بقعه اليأس الي كنت فيها. و اندمجت معاها بالسوالف الحلوه.

 نسيت اقول لكم عن هديل..

 كانت بنت جيراننا و كنا نلعب سوا ايام المراهقه يوم عمري 13 اهي اصغر مني بثلاث سنوات, كانت طفله بالابتدائي و انا مراهق بالمتوسط, انتقلو لمكان ثاني بمنطقه ثانيه بس صداقتنا ما وقفت و مشاعرنا كبرت,  يا الله ما عمري عشقت بشر مثلها, اهي هديه من رب العالمين, شخص شاف كل جوانب شخصيتي المختله, شافت الجوانب الحلوه و الخايسه و تقبلتهم, لمن كنت امر بمشاكل بسبب امي و ابوي اول ما بدت شخصيتي المختلفه تبان كانت اهي يمي, و كانت معجبه جدا بشكلي, طفله عمرها  10 سنوات, تفكيرها طفولي ما لوثتها افكار و خرابيط الجيل الي قبلها للحين. كانت دايم تمشط كشتي و اهي الي تختار اللون الي اصبغ فيه شعري و دايم تقول: دوتس شعرك عجييب نااعم و كثيف و ريحته حلوه ابي شعر مثله.

كانت تحط راسها على راسي لمن تمشط شعري و تشم ريحته, كنت انحرج و ابعدها,اهي بمنظورها الطفولي مو قاعده تسوي شئ مع ان الحركه عيب. قلبي كان يخفق كل ما قربت مني.

غابت عن ناظري ما يقارب ثلاث سنوات و لمن ردت شفت الطفله فجأه كبرت لفتاه جميله, الحمد لله ما كانت من البنات الي لبسهم فاضح, كانت كلها حياء, الطفله اختفت تماما و حل مكانها هالجميله. ما انسى شلون قلبي قام يخفق بشده اول ما شفتها لمن زارتنا مع امها. كنا نتواصل بالايميل و نعرف اخبار بعض بشكل يومي بس كانت بذاكرتي ثابته عالطفله ذات 10 سنوات.

انا كنت احبها من يومها طفله بس الحب تغير لشئ ثاني لمن شفتها, ابيها تكون لي لحالي شنو الغلط بهالشئ؟ كلمت امي اكثر من مره و كله تقول هدها مالك فيها ماهي مننا. ما كنت افهم كلام امي, شنو الي بالضبط مو مننا؟ كلمت امي عنها اخر مره لمن تخرجت و انقبلت بالكليه, و كانت امي تقول "مذهبها غير مو من قبيلتنا ولا هي حتى من عرقنا"  يمه ماني فاهم, اهي مسلمه كويتيه شكو الدين و العرق؟ يعني الحين زوجه خالي الامريكيه كانت مسلمه ولا كانت كويتيه عربيه؟

رن تلفوني ساحبني من افكاري, حمني: يو مان, تدري ان اول اختبار قصير طلعت درجته؟

:صج؟ متى شلون وين شدراك؟

:وحده وحده يباشا,  جيك عالصوره الي بقروب الكلاس, بس لا تبجي. انا اطين منك.

اوه ماي قاد!!!! مو من صجج!!!! لييش !! انا حال عدل و دارس عدل ليه هالدرجه الزفت!!

اسكت لا تصارخ علي انت حمار انا شكو

عكرت مزاجي الله يلعن ابليس, اف يربي الحين شسوي لو جبت هالدرجه باختبار منتصف الفصل =_=

خلاص مصطفى لا تتحلطم واجد شوفني انا ساقط و عادي مثل الماي على قلبي و شكلي ماراح احول لتخصصك

انت دايم فاشل ما بتفرق معاك

 اح جبهتي, المهم لا تتكدر روح للدختور و شوف انت شمهبب, يالله سلام. 

نزلت للصاله بعد ما لبست بجامتي و كبوسي المخروط بو كره فرو, خشيت لوسيفر بالكبت ابي قهوه تظبط مزاجي و ارسم عشان انسى الدرجه

 قمت انادي: لجمي واحد هوت كوفي وذ جوكلت الحين انا يجي يسوي انتي طلعي الاغراض.

نزلت السلالم و الدرجه الخايسه براسي و متعكر مزاجي, الصاله هاديه و المكان هادي شكله خلصو الاجتماع لمناقشه كيفيه تصليح العطب الي فيني XD  

دخلت المطبخ, يا الله شفايده مطبخ بهالحجم؟ كبير بشكل غبي اوك اغنياء بس مو معناته كل شئ يكون اكسترا كبير! و غرفتي محكر حمام !!

جت ميري: بابا سوفي, في هادا كوفي زديد بابا آلي يجيب حق انتا مو سيمسيم قبل هوا يقولي بابا همزه يحب كوفي مأ شوكلط.

اخذت الاغراض: شكرا لجمي, بعدين شنو همزه عوقتي ابو اسمي XD  ميري نام دوتس هي همزه نهي, اجا ؟ "اوخص علي ارطن هندي"

ردت و اهي تهز راسها: اجا بابا همزه معلوم هي انتا الحين همزه دوتس

لا ولج, بس دوتس لا تقولين حمزه  بعدين شالي خلا اسمي همزه! همزه وصل ولا قطع =_=

قمت اظبط الكوفي حقتي و وجهي معفوس بسبب الدرجه, دخلت امي المطبخ و اهي تكلم بالتلفون: اي ام هادي اي حبيبتي العشا باجر عند ام تركي, -طالعتني و انا معفس وجهي-  لحظه ام هادي, اشفيك يمه وجهك جذي صاير شئ؟ خرعتني!

استغربت, توج لاعنه خيري بالكلام و المحاضره !! : لا ابد يمه سلامتج بس عكيت بالاختبار و متضايق.

:ويه حسبالي في شئ لا تعفس وجهك بروحه يخرع بدون ما تعفسه, اشرب قهوتك و كمل طقوسك و بتنسى, اي ام هادي شكنا نقول؟

طلعت من الثلاجه كيكه و اخذت شوكه و راحت للصاله. استغربت امي اشفيها فصام! مره جذي و مره تفصل علي, مره الوضع عادي و مره حيل مشتطه و تدعي و تقول كلام يسم البدن!  الكتلي خلص و الماي انغلى, حطيته بالكوب و حطيت قفشتين من القهوه, حطيت سكر و ثلج, ما احب اشرب شئ حار, اسويه حار عقب احط ثلج.. معوق ادري  =_=

جلست بالصاله, كان السكتش مالي عالقنفه, شكلي نسيته امس. قمت اشخبط ارسم دوائر بدوائر  بدوائر و شخابيط خطوط يمين يسار ليما برقت براسي الفكره و من هالشخابيط رسمت وجه طفل صغير لابس لبس مشابه لي.

الساعه 10 بالليل ساعتين زود و اروح اخمد, نزل ابوي عقب ما خلص فلم داخل الــ  room theater  و جا يقرا الجريده و يطالع مع امي المسلسل الاجنبي  once upon a time , طلع مستر قولد و تحمست قلت اسمه بصوت عالي, لفت علي امي: شفيك بسم الله خرعتني

ما توقعت انكم تحبون شئ انا احبه, تتابعون هالمسلسل!!

التفت علي ابوي: شفيك شكلك مالك خلق؟ خلني اخمن, طينتها بالاختبار؟

هزيت راسي و انا اشخبط بالسكتش, هديته و ارتشفت قهوتي: تعبت و انا ادرس له

رد يطالع المسلسل: بتكبر و تنسا لا تهم نفسك.

طالعت الكراسه, متى رسمت كل هذا؟ ظليت احدق بالرسمه, الطفل الصغير بو بجامه و كبوس مخروط ماسك بايده دميه دبدوب و دفتر سكتش و وراه امه و ابوه و مسوين حبتين و يضحكون, جنهم يصورون صوره جماعيه. ليش رسمت جذي!؟ اعتقد عقلي الباطن يعبر عن شئ له دخل بالي قعد يصير الحين, امي و ابوي لمن تجيهم هالحاله احس اننا صج عائله, من زمااان ما جا هالسكون و السوالف البسيطه العاديه, كل مره يا ما نشوف بعض او ان شفنا بعض هواش و هواش او محد يكلم الثاني و اظل بغرفتي. ماراح اخلي عيالي يحسون بهالبرود الي قعد اعيشه.

وزع الاوراق الدكتور و شفت اغلاطي الغبيه, الحل الي لازم اكتبه لرقم 1 ليش انحول و اكتبه بسؤال رقم 2!!؟ شهالغباء و الانثوال, قمت اضحك من الغباء

 الدكتور يقول: الا انت ما توقعتك تجيب هالدرجه كنت شاد فيك الظهر بس انتبهت ان الاجابات مو بمكانها, عندي امل انك تجيب الدرجه النهايه و تبرد قلبي.

جا حمني و قط نفسه على ظهري: دونت ووري دكتور ترا هذا مصطفى ان ما فلح هو محد بيفلح عندك بالكلاس و انا اوعدك انه بيجيب درجه ممتازه و اعزمه على مطعم من حسابه.

طلعنا من الكلاس, كان اهو الوحيد الي عندي لليوم الثاني كنسل محاضرته, اخذت جاكيتي من عالكرسي و لبسته, الجو بادي يبرد بشهر 11 , لبست الجاكيت و حطيت سماعاتي باذوني: حمنيوه وين بتذلف الحين؟ انا بلسق معاك ما عندي كلاس.

حمني: خنروح كافيهنا بعيد عن الزحمه الي هني بالكليه.

دخلنا الكافيه, كانت هديل ناطرتنا هناك, رفعت ايدها تأشر لنا عشان نعرف وين قاعده. مشينا صوبها و قعدنا, طلبت طلبي المعتاد و حمني طلبه المعتاد, جاي ليبتون العلامه الصفراء. جاي كافيه تطلب جاي!!

حمني: طلع طلع ورها شلون انك عبقري.

طلعت من جيبي ورقه اختباري و حطيتها جدامها, هاج شوفي فشلي الفاحش

امس معصب و الحين ميت ضحك على نفسي و على خيبتي عقب ما عرفت اسباب الغلط.

حمني: ترا اهو شاطر اهو مو غبي مثل ما شكله يوحي او مثل ما الاختبار يقول و الاختبارات لا تخطيء

جب انت قاعد تسب فيني و انا محترمك =_=

هدول شكله حبيبج بيجيب العيد قبل ميعاده هالسنه بنعيد كريسماس قبل ميلاده XD

احمرت وجنتيها و رمت عليه مقلمه المكياج: يالقرد عيب شهالحجي انا الغلطانه جايه و انت موجود >< اتادب ولا اعلم عليك خالتي "نسيت اقول لكم هديل تقرب لحمني"

بعدين مو غريبه عليه اهو من دخل الكليه و اهو مقوع

حمني: اهو ترا عبقري و العباقره دائما محد يستوعب خطهم, شرايك فيني و انا اسلك لك

طالعته بنص عين: جب يا تيس بدون لحيه, يعني انت الي مقصر شوف درجتك اول

حمني: اححح جبهتي ._.

مرت  الايام و خلصنا الكورس الاول و اخيرا العطله جت, الايام كانت ممتعه مع حمني و هديل, الشائعات ردت من جديد, بو اشاعه ما ياخذ راحه, اشاعه هالشهر مو جديده, دوتس ابن ابي دوتس خكري و يظبط اولاد, ظبطو خشتك بعياده باطنيه غير مرخص, حسبي الله عليك اخيه بس لو اصيدك والله لاطلع فايده حزام الكاراتيه عليك. رديت البيت و كلمت امي للمره المليون عن هديل, يمه ابيها و ألقى نفس الرد: لاهي مننا ولا من عرقنا ولا من طائفتنا و بعدين اهي ما تبيك اهي تبي فلوسك افتح عيونك يالغبي انت منو بالله الي يقدر يتقبلك عشان يحبك, غير ربعك الي مادري شلون صايرين. طيعني يولدي.

طفح الكيل, رديت بصراخ: ولــدج ! منو؟  أنــا؟ من متى !؟ ما اذكر انج بيوم كنتي لي  "أم "  !! بعدين بأي حق تمنعييني اني اعيش سعيد مع الي قلبي يبيها؟ اسباب تافهه, زوجه خالي مسيحيه امريكيه و زوجه عمي من سوريا؟ اسبابج ما تنطبق علي انتي تبين الحجه عشان تحطمين احلامي.

ردت و اهي متنرفزه: زوجه خالك دين ثاني و زوجه عمك عربيه هديل مو من ملتنا يا ولد افهم ولا هي من عرقنا او قبيلتنا.

نرفزتني, مادري اكلمها بشنو المنطق ما ينفع معاها: مو اهي و انا مسلمين!؟ مو كل مسلم ربه الله و رسوله محمد و كتابه القران و يؤمن بان لا اله الا الله و ان محمد رسول الله !!؟ مو كلنا كويتين و عيال عوايل معروفه؟ ليه تفضلين المسيحيه علينا؟ شنو مو من عرقك ليه هديل هولنديه ولا فرنسيه ولا بريطانيه؟

حطيت اصابعي على راسي و قمت ااشر: كبرو هذا كبروه يا امه محمد لا تضحكون علينا الدنيا.

تركتها تبطرم لحالها و صعدت غرفتي. لو اني اعرفها من النت او اهي بديره ثانيه جان الحال احسن, بيكون الامل مقطوع نهائي, بس هالشكل اهي بين ايديني و قاعده تفلت كل ما حاولت اتشبث فيها. هديل بتروح مني. دخلت غرفتي و رميت جسمي عالسرير: تبون تسلبون شخصيتي و حياتي و اصحابي و الحين الحب الي لقاه قلبي, عشان شنو؟ شبكت السماعات بالتلفون و حاولت اغمس نفسي بالاغاني علي اهرب من الواقع مع اغنيه  one reason  

Every day goes by with ought  a second thought, livin in the perfect and controlled project

دحست نفسي تحت البطانيه و تقوقعت على نفسي, ضميت التلفون لصدري و عليت الصوت ابي افكاري توقف. صوت داخل راسي مو راضي يسكت, اه صح, انا دايم اكلم نفسي بالليل ما اقدر الحين ابطل من هالعاده.. تعبت وايد صح؟ ادري و انا هم تعبت, بس شنو بايدي اسوي؟ يا ربي كل شئ منك خيره او اختبار, ان كان اختبار فانا بالتأكيد افشل فيه. قضائك و قدرك ما اقدر اعترض عليه يا ربي انا مؤمن فيك و برحمتك و انه لازم شويه ألم عشان نذكرك, بس يا ربي زادت جرعه الالم, يا ربي اثكل قلبي الجرح ما عدت اتحمل, يا ربي كل شئ يسعدني قاعدين يسلبونه مني. رد صوتي داخل راسي: اصبر اصبر, و رديت على نفسي: بصبر يعني شنو عندي غير اني اصبر. طفيت الاغنيه و خمدت.

..............................................................................

مبروك الاجازه جو تشان لقد انزلت الفصل بعد الاختبارات لاجلك xD

رايكم و انطباعاتكم تهمني .. 

شنو تعتقدون بيصير مستقبلا بالاحداث؟

اهتمو بنفسكم و كونو بخير .