الفصل الأول

بسم الله الرحمن الرحيم.. 

لك يا نفس, اقدم هذه الروايه التي نسجناها و رسمناها معا
انا احبك .. 

مولود فالمكان الخطأ, فالجسم الخطأ عند العايله الخطأ, كم مره جالت بفكركم هالفكره المخيفه؟ انا اعيشها كل يوم لدرجه اني بديت اتعود عالوضع و انا مقتنع بالفكره.

اوه المعذره ما عرفتكم بنفسي, اسمي *** , ما احبه و ما كان لي خيار في الانتقاء, اصحابي ينادوني دوتس, هذا الاسم الي معروف فيه عند اصحابي بالنت و بالمدرسه  و عند امي و ابوي. ولدت بملامح وسيمه, بشرة بيضه شاحبه, و عيون عسليه تكسوها الصفره, شعر بني ناعم يغطي رقبتي. بالنسبه للستايل فانا احب و مغرم بالشكل الجامح للستايل الغربي الصاخب الـ gothic  لبس بالوان غامجه, سلاسل و اكسسوارات تزينها جماجم بقرون و اشواك ,الناس تلقبنا بال ايمو و احيانا punk  و دايم يقولون اننا satanic , انا ماني لا من هذا ولا من ذاك, انا نفسي ومالي دخل فيهم, انا مو نسخه. اعيش وسط عالم متخلف لا يقبل أي غريب فرفض وجودي لاني مو "نسخه" من الشعب الي نصه متخلف. ما همني مجتمعي الي ينبذ وجودي لاني مو "نسخه" من بسروال و فنيله, ولا همني الناس الي تشوفني بنظره خوف و احتقار و احيانا تقزز و ياكلوني بنظراتهم, ولا همني حتى اهلي الي كل يوم مسوين لي قضيه و محاضره في "كيف تكون نسخه لكي نحبك" كل هذا ما يعني لي شئ لأن اصحابي متقبليني و يحبوني لذاتي و دايم يقولون اني اكبر محشش فكاهي (مع ان احمد اهو صاحب هاللقب و بجداره) بفضلهم انطر يوم الغد بشغف.

ممكن اسألك سؤال ياللي تقرا سطوري؟ كم مره امك صرخت بوجهك: لو تموت بنفتك من الفشيله و سواد الوجه. كم مره ابوك قال لك: وجودك سيء لدرجه النفور من الدنيا.  كم مره شافك تصلي و يقول لك: انت من متى اسلمت؟ و يتكلم بكل استغراب كأنه جاد بسؤاله!!  كل هذا لان الاشاعات ما تنقطع و حجي الناس عني سيء, اهلي صارو يخشون (يخفون)  وجيهم بسبتي!! طيب ليش؟ كل هذا لاني مو نسخه من  "سروال و فنيله" !!  و الي مجننهم اكثر, الخصله الي كل شهر يتغير لونها حتى رسيت عالبنفسجي. مادري من متى و البنفسجي حكر للبنات!!

 قلت لكم عن الاشاعات الي طلعت؟ تعالوا ضحككم شوي, بو اشاعه "مثل ما احب اسميه" خوش ادمي كل شهرين يطلع حجوه جديده تضحكني, مره قال اني عابد للشيطان و جاني واحد يسأل يتحقق من الاشاعه قلت له و انا اطالعه بنص عين: احلا اشاعه هذه,  شرايك انت؟  تبيني اوريك السيد ابليس عشان تتاكد من الاشاعه ولا اقدم روحك قربان  =_= . و ابو اشاعه طلع بعد اني transexual  و مره اني اذبح قطط سوداء كل يوم يكتمل فيها القمر XD  هذا و انا محب للحيوانات و اقدس الارواح !! اخييه لو اصيده بو اشاعه بخلي لحزام الكراتيه الاسود فايده.  مره بو اشاعه طلع  اشاعه اني خكري لان الستايل الـ gothic  الاسود مع السلاسل و اكسسوارات الجماجم و النجمه الخماسيه المقلوبه و الالوان البنفسجيه للبنات xD  مع انه لو بنيه تلبس جذي بيقولون عنها بويه !!.

تعودت عالبرود من امي و ابوي و الفراغ الي بقبي يكبرمع كل سنه  بس وجود اصحابي يغطي و يملي جزء كبير من هالفراغ. احمد ربي كل يوم الي اعطاني ربع مثلهم.  

اعتقد لازم تعرفون اني ممتاز بدراستي فالمنحه  لبرا مو صعبه علي "مع ان ثراء عائلتي الفاحش بيخليني اروح اي مكان براحتي حتى لو اني مو شاطر". حصلت عالحزام الاسود بالكاراتيه و معلمي كان معجب بمهارتي, و مدرسيني و كلهم يحبوني لذكائي و شخصيتي المرحه بالصف الحمد لله انهم مو متأثرين بالتقاليد القديمه الي تصنف الناس حسب شكلها. كذا معلم  اثنا علي و اعطوني دروع و شهايد تقدير, ليه صعب على امي و ابوي انهم يشوفون الي اساتذتي شايفينه فيني؟  they shut me out just because the society doesn’t accept me !! 

هذا و انا ابنهم الوحيد.

شكلي كثرت عليكم بالجانب الاسود من حياتي,  تعالو احكي لكم عن سبب حبي للحياه و كشرتي الي ما تفارقني. صدقوني الي ما عنده ربع محششين مسطلين فكاهيين  ماراح يفهمني, ولاهو ذايق طعم الحياه, شله الفساد "كما احب ان اسميهم XD " اهم الدافع الي يخليني انطر يوم الغد بكل شغف و فرحه. نحب نفس المسيقى و نفس تصنيف الافلام و نفس الاهتمامات تقريبا و كلنا اوتاكو و هذا اهم شيء, لكل واحد فينا شخصيه مختلفه, احمد محشش كبير عبدالله يدعي العقل جدام الناس و الرزانه بس هو بالصج فله و دمه خفيف و يحب الممثلاث و كل سنه يتعلق بوحده و تتزوج و يجينا متحطم, حمني فكاهي و راعي مقالب و غريييب اطوار جدا  عادي و انت تتمشى ينط بوجهك من شجره جنه طرزان.  صدق او لا انا المطوع بينهم امشي و اقول هذا حرام و هذا ميجوز  XD

احنا يالاربعه  سمعتنا بالمدرسه تسبقنا و الحمد لله بشئ حلو "ما عداني احيانا  بسبب الاشاعات الي تأثر بالمعلمين كبار السن الي ما عاصرو النهضه مالت الالفيه الجديده و سبيستون"  ما عليكم بالطويله, الثلاث هذيلي اكبر محششين فالدنيا و احن ناس شفتهم بحياتي, اشخاص معاهم اقدر أكون نفسي و انسى المشاكل و اضحك لين ابجي من الضحك. مغامراتنا يا كثرها و مقالبنا ما تخلص مع الناس الي نمون عليهم "صفي" , كبرنا سوا و علاقتنا فبعض اكثر من اخوان.

في صفنا تلميذ جديد مقلبناه بمساعده باقي الصف.

أحمد بصوت خافت: هيه يالجديد وشلونك؟

الجديد: أهلا بيك احمد, الحمد لله بخير, ليه بتكلم نفسك كده؟

احمد: ابد مابي المدرسين ينتبهون للي بقوله. وش رايك تبيعلي اسئله الاختبار ادري ان ابوك بالتوجيه الفني للرياضيات, بالمقابل بعطيك حشيش مجاني ان نجحت

الجديد: هههه نكته قديده.

مر ولد يمهم و همس لأحمد: لا تصير اثول يمكن يبلغ عنك.

 رمق الولد الجديد بنظره تهديد جنه يقول: فتن و بافك بطنك نصين.

الجديد صدق السالفه و خق, دخل حمني للصف من الدريشه كالعاده: احمد جت دفعه جديده من الـ.. اوه الجديد هني اسف ما انتبهت لكلامي شلونكم؟  يالله سلام.

الجديد صدق زود و اكل المقلب و صار خايف من احمد و كل الصف يبين للجديد جديه الامر و انه لازم يهرب الاختبار.

 جيت للجديد انصحه: يا جديد انصحك تسرع من تصرفاتك البطيئه لان حمني شاك بانك ماراح تجيب لاحمد الي يبيه و طلبو مني اكلم الجن عشان نتاكد و انا ما ودي استخدم قدراتي و طقوسي "الجديد صدق احدى الاشاعات بكوني اتواصل مع الجن" XD

جانا عبدالله الفيلسوف العاقل: دوتس لا تخرعه خله يسوي الي يبي الضغط النفسي بيولد رد فعل سئ و ممكن ننقفش كلنا و يزج بنا خلف قضبان السجن.

 رفع نظاراته لعيونه بعد ما انزلقت على خشمه و اعطى هذيك الــ " اورا" الي تبين انه خبير.

تملك الجديد الرعب و القلق و راح يبري نفسه و ينجو من شباك شلتنا السيئة بتبليغ احدى المعلمين "المعاصرين للالفيه الجديد" كما اسميهم XD و الحظ قطه عند المعلم الي يحب يمقلب مثلنا فدخل ويانا موجه.  المعلم ابدى التعجب و مثل الدور بانه مصدوم و عقب ما الجديد تحمس بشرح السالفه جابنا المعلم و قام يهاوشنا جدامه: جم مره قلت لكم لا تفضحون سرنا لاي احد و بالذات الجدد؟

الجديد انصدم و قام يولول بداخل قلبه: وش جابني للظيم جنت مدلل ولج يمه رحت فيها بشله مافيا كويتيه انا ايه الي قبني هنه للكيويت.

حمني يتكلم بكل ثقه: قلت لك يا احمد انه بيخون ثقتك وشلون تثق بجديد؟

رد عليه عبدالله: محد يستمع لكلامي و رجاحه عقلي قلت لكم بيكون في رد فعل منه لانك ضغطت عليه و هددته بشياطين دوتس هو من شاف خشته و البنفسجي الي براسه خق .

رديت و انا اطالع بنص عين: شنو فيها بنفسجيتي تغار لانك شبه اصلع و شعرك مو ناعم مثلي =_=

المعلم: اسكتو فضحتونا بسكم هواش, انا اقول لو نكتم عالمشكله احسن.

كلنا التفتنا للجديد و اعطيناه النظرات المخيفه, قام يبلع بريقه و اهو خاق.

عبدالله: حسب حساباتي و خبرتي اقول انه نقدر ننهي العمليه بنص ساعه و نبلشها بمخدر من كحولا ت حمني عشان ما يحس و عقب نغلق القضيه.

رد عليه احمد: انا ودي بشئ مؤلم لانه خان ثقتي.

الجديد من الخرعه للحينه متسمر متجمد بمكانه ما يجرؤء حتى انه يتكلم.

اكمل المعلم: اوافقك الراي يا عبود و هم حمود معاه حق. وش رايك دوتس؟

رديت و انا مكشر و مبين انيابي و حواجبي رسمت رقم 7 : ودي اجرب التلبس بس للحيني ما عقدت صفقه مع الجن الاكبر عشان هالصلاحيه الي تخليني اسلب الروح ولاني مو جايب معاي التمائم الازمه لاستحضار الجن. "شكلي يغصب الادمي انه يصدق كلامي و يصدقني" XD

خلصت جملتي و شكلها خطتي اهي الي  خرعته اكثر شئ, خر عالارض يبكي و يبكي و يترجانا انه نتراجع عن فكرتنا بـ "غلق القضيه" و شكله بالدموع و الاشياء الاخرى التي تخرج من خشته لوعت ابو جبدنا و جعلتنا نفطس ضحكا في قلوبنا.

لقد اكلها الجديد و هذا اكثر واحد ارتعب جذي و تعابيره لا تقدر بثمن. بعد ما ترجانا و اهو على الركب قمنا نضحك و فصلنا ضحك حمني فحط عبدالله بس كتوفه تتحرك احمد يصفق ايده بالجدار من الضحك المعلم ماسك بطنه و انا اتحرك جني سكران من الضحك و الجديد يطالعنا مرعوب و استوعب انه مقلبناه فعصب و صفق احمد كف و رفس حمني

 الجديد: تبا ليكم  دنتو خرعتو امن قابتني (  قام يضحك  ) امه من مألب والله وأفتو ألبي الله يلعن ابليس قتكم نيله.

ردينا الصف متاخرين و لمن شافنا معلم البدنيه عرف السالفه و

 قال للجديد: مألبوك مش كده؟ ايه رأيك بالمألب؟  دنه شفت الهوايل من دول الاربعه و بكل مره يقي حد قديد مبنعرفهوش بيعملو كده كترحيب بيه.

الجديد: وأفو ألبي دنه بغيت اوأع من الخوف يخراشي,  بس صراحه حماس بغيت اتقلط من التخرع.

خلص الدوام المدرسي و تغير المود و تعكر المزاج  بسبب صراخ امي و ابوي الدائم و الهواش و المحاضرات الي ما توقف كل ما شافو وجهي. الي يقول كله من تدليلك له و اهو صغير و اللي يقول ولدج هذا و تربيتج هذه و واحد يلوم الثاني. يا ربي ليه اغث نفسي اهم دوم هالشكل. حطيت سماعات التلفون باذني و قمت ادق رقبه على انغام اغنيه " chummug challo " و دخلت غرفتي الفوضويه الجميله فتحت كتبي و مارست هوايتي المفضله (اي نعم احب ادرس جدا احس بمتعه كل ما حليت شئ معقد) XD

تعبت من المذاكره و حليت واجباتي ختمت انمي تصبيره (يعني بو 12 حلقه عشان اضيع الوقت بشئ مفيد) رميت نفسي عالسرير و انا منهك بسبب الضحك الي بالمدرسه و غطيت بنوم عميق بسريري الدافئ. متجاهل صراخ امي علي بسبب شعري الي طولان حبتين.

مرت الاسابيع الثلات الاخيره بسرعه, و الاسبوه الرابع -  الي هو هالاسبوع -  عطله الاختبارات النهائيه للفصل الدراسي الاول. السماء ملبده بالغيوم و بدت تمطر و تبرق و انا طالع من المكتبه اصور تلاخيص للمذاكره, راد مشي للبيت و السماعات باذوني, غطيت راسي بقبعه جاكيتي الكحلي: اللهم صيبا نافعا.

 كتفت ايديني من البرد.  شرد  ذهني لدقيقه و قمت افكر اشلون اتعامل  مع امي و ابوي, الي صار امس و الكلام الي قالوه  كان too much  لي اني اتحمل, كان جارح بشكل محد يتصوره كلمات قويه يقطونها بوجهي بسبب الاشاعات  الي تزيد كل يوم, يوم يدعون لك و سنه يدعون عليك!!  ما ادري شلون تمالكت نفسي و طلعت قبل ما اقل ادبي. ليش يسون فيني جذي انا ناقص عشان يجون يزيدون علي؟ الاغنيه الصاخبه ما قدرت تاخذ تفكيري للبعيد فغيرت الاغنيه لوحده اكثر صخب محاول نسيان الي صار و اعيش جو الاغنيه.  الحمير الي المجتمع متقبلهم  "الدرباويه" كانو يقحصون و يفحطون تحت المطر طيرو بركه المطر.

 خاطبت نفسي: اكون مجنون مطفوق مثلهم عشان يحبوني  و اصير خوش ولد نسخه  و محبوب, او اضل على نفسي و شخصيتي المختلفه  المختله و اظل بنظرهم مـِـثـلي و عندي طقوس شيطانيه!

تذكرت كلام امي الي امس و شديت قبضه ايدي على ذراعي و دمي بدأ يغلي. يريتها مو فتره اختبارات نهائيه احتاج وجود ربعي يمي, هالاسبوع مر جنه سنه و اهل ربعي ما يبلعوني فما اقدر ازورهم, و ما نقدر نطلع أي مكان لانهم محبوسين بسبب الاختبارات.

وصلت عند باب كافيه: شكله دمي محتاج كافيين و جابني هني.

 كوب موكا بارد مع هالاغاني و بنسى كلام امي و ارد البيت و اكمل لعب سوني عقب ما اذاكر. اسف يا لوزتيني شكلي بقضي عليكم بهالبرد.

اخذت الموكا و كملت طريجي, كانو الدرباويه مسكرين الطريج بالاستعراض مالهم و ريحه احتراق المطاط مال التواير خنقني, لمحت من البعيد سياره مألوفه كأني شفتها من قبل حاول السايق يخفف بس المطفوقين الي يقحصون ما اهتمو و بسبب الارض المبتله شكله الحمار فقد السيطره و صدم السياره و دخل فيهم درباوي ثاني!! صار دهس جدام عيوني و انقبض قلبي من الخوف, السياره استوت بالارض و الي داخلها طلع دمه للشارع, قلبي ينغزني في شئ سيء اقتربت اطالع ولا اشوف المنظر المهول!! طاح الكوب من ايدي و السماعات من اذوني و انكسرت شاشه الجوال عالرصيف, تسمرت بمكاني. حاولت انكرالي شافته عيوني عشان ما يكون صج, برد جسمي و فقدت الاحساس بالي حواليني و أطرافي نملت, يريتني ما مريت اهني عشان ما اشوف هالمنظر!!  صوت داخل  نفسي يصرخ: كابوس و بصحى كابوس و بصحى كابوس و بصحى غمض عيونك و بتصحى غمض يالغبي و بتصحى. 

فقدت القدره على التحكم بجفوني: ليه ا نا مو مكانه؟ ليه الدرباوي مو مكانه؟ ليه مو احد من الجمهور الغبي مكانه؟  الي سبب الحادث طلع سليم و اهو مات!!

رحت للدرباوي الي بدى الحادث و فقدت اعصابي و طحت فيه طق, حسيته بيلفظ انفاسه الاخيره  تحت ايدي كفي تلطخ بدم وجهه بعد ما شفت الاحمر على ايديني, لفيتهم حول رقبته, سمعت صوت طقطقه عضام و لونه قلب ازرق, لو ما الناس فككونا كان ارتكبت فيه جريمه.

كان التنفس صعب علي بسبب الهوشه و الصدمه, حسيت اني اختنق مو قادر اوقف, إلتفتت وراي لقيت أحمد جثه هامده. بردت اطرافي و حواسي انشلت, صوت لغط قلبي صار مسموع حسيت ان الدنيا تدور و بيغمى علي, دموعي خانتني و ما نزلت كأنها نشفت, عجزت اصرخ عجزت ابكي.

اذا فقدت شخص عزيز بتعرف مقدار  الحزن الي فيني و ليه ما قدرت ابكي. شعور كبير  بالخساره ما عمري حسيته من قبل. ما أدري شلون قدرت ارد البيت و اول ما امي شافتني خافت, و استلمتني شفيك يولدي شصار منت على بعضك. شقول لها؟؟ اقول يمه ولدج فقد خويه؟ اقول لها احمد مات؟ الحروف تعجز تطلع من حلقي وشلون بقدر اعطيها هالخبر بكبره!! عجزت عن الكلام و شكلي يرثي لحالي, و اول مره امي تسأل, يمه ولدج فقد غالي.

حبست نفسي بالغرفه يومين ما اكل ولا اشرب, منو تجيله نفس ياكل شئ بهالظرف!؟

كنت عالكرسي و قبالي الطاوله مالت الرسم, لاني بالي قادر اعبر برسم ولا بكتابه كأنهم ينتقمون مني مثل دموعي, ماني قادر اعبر بأي طريقه المشاعر داخلي تتصارع وتخنقني مو قادر اتنفس. حطيت راسي عالطاوله, حسيت بشئ حار يمشي على خدودي لمستهم لقيت دموع. اخيرا عقب يومين قدرت ابكي و حرقه قلبي خلت الدمع حار ذوب مقلتي بين اهدابي. اجهشت بالبكي و رميت نفسي بالسرير, تقوقعت على نفسي متلحف بالبطانيه المخمل الناعمه الصغيره.

 راح الغالي يا ربي راح الي كل يوم يفكر كيف يضحكني, راح سندي راح حبيبي و اعز اصحابي, راح الحنين فقدته بلمحه عين, يا ربي ليه ذقت يومه و انا لحالي يا ربي انا ما اقوى على صدمه جذي.

نمت على بطني مثل الشرنقه و انا متلحف بالبطانيه المخمل بظلمه الليل و بالبرد, مر شريط الذكريات بعيوني, كنا صغار 8 سنوات تقريبا اغفو بالصاله و يجي يزورنا مع امه يحاول يصحيني و ما اقوم يروح يحط ايدينه بالثلج الي بالفريزر و يجيب  حبه بايدينه و يحطها على ظهري, اصرخ من الخرعه و اناقز و انا نص نايم و يضحك علي: جنك بنيه تصرخ. اروح اطقه عقب نضحك على بعض.

جتني ذكرى من اليوم الي كنت اكل فيه اندومي و رجل داخل الكرسي و رجل على ايد الكرسي جني معوق و الصحن على بطني او مثل ما يسميها احمد : كرشتي" و افرفر بالتلفزيون, كنت عصقول مثل المسواك على قولته مع اني اكل واجد, كان يقول انت تاكل و انا الي امتن,  قمت من مكاني ما اذكر ليش و لمن رديت و قعدت لقيت صرصور بالصحن, من الخرعه شلت الصحن و قمت اركض له: احمااااااااااااد احمااااااااد صمخ وينك لحق علي صريصير. صووتي مرعوب و من شفت خشه احمد كبيت عليه الاندومي لا شعوريا, جني اقول له هاك هالزهيوي اذبحه. طلع اهو ممقلبني و حاط صرصور بلاستك. يومها ربطته بحبل و قعدت فوقه و كفخته ليما قال عن نفسه" انا حمار و غبي و انت سيدي سامحني"

كثير ذكريات مرت بذاكرتي آلمت قلبي المكلوم. من تعب البكي نمت و ما حسيتا لا ثاني يوم الظهر, ما لي نفس اسوي اي شئ بس لازم اطلع للعزي -الي جنه خلص- اروح اشوف ربعي ادرس شوي للاختبارات. ما قدرت اخفي دموعي هذاك اليوم و انا نازل للمطبخ اجيب لي "اخيرا" شئ ينوكل و يعطيني طاقه.

شافتني امي: وينك يومين ما بينت ليه ما رحت للعزا انت مو صديقه؟ ليه ما نزلت شعندك بالغرفه ؟ مغير ظلمه و ريحه شموعك تحترق شتسوي بالظبط انت ما تيوز عن سوالفك و خرابيطك!؟ رفيجك متوفي و انت مع هالشياطين الاغاني و خرابيط الجن لو الله ماخذك مكان احمد مو احسن لي و لابوك!؟ بعدين شنو هذا للحين ما قصيت هالكشه الي جنها كشه بنيه مو ناقص الا شباصات و تيجان عشان وحيدي يكون انثى.

ما رديت عليها, بس طالعتها و ابتسمت, اخذت الحليب مع التوست و الجبن و رحت غرفتي.

يمه ماشاء الله عليج ما تفوتين اي لحظه عشان تغثين, اهو بس انتي جذي ولا اغلب الامهات جذي!؟

عندي اختبار باجر لازم استعد له أول اختبار نهائي, لمن نواجه صدمه كبيره نحس ان الكون سكن و كأن الدنيا راكده, نسيت انها تمشي ولا توقف على موت احد و باجر اختبار لازم اذاكر له. فتحت كتابي الكيميا, الصفحه الاولى توقيع بخط لا يفهم مسويه حمني على انه رمز للحمايه و ختم للحفاظ على درجاتي و كاتب يمه: ذكرى 5 نوفمبر, و يمه وجه يضحك مسوي حبتين. تحتهم كلامنا بالحصه.

هيه دوتس عطني حب – ما عندي حب اذلف الي ظل يدوب يكفيني – زين عطني علج عندك وايد – اسكت المدرس انتبه لنا – بقول له استاذ شوفه الخبل بو قذيله يفصفص حب -  اكسر حبيبته – الا السوني تخسي – الا الدرجات يا روح امك – انت بديت – انت قلت تبي تعلم و بتطير درجاتي – و انت بتكسر سونيتي حبيبتي ....

قفشنا المدرس و نقص حمني درجتين و سامحني لان حسب حكمه من الكلام الي تم الخطأ خطأ حمني.

الله على ذاك اليوم لو الزمن يرد له, كان احمد هناك و كلنا مستانسين.

 جا اول يوم فاينل و العطله كانت قصيره ما كفت للدراسه, و الاحداث الاخيره مسحت كل شئ تعلمناه. كان ودي اغيب بس ادري بيكونون هناك و بيحتاجوني, ادري رغم القوه الي يبينون عليها شئ مثل هذا يبين هشاشتهم و ضعفهم. كل ما زاد حبك لشئ و فقدته فجأه زاد الألم و مابي لحمني او عبدالله انه يواجه هالالم لحاله لازم اكون هناك لهم اهم محتاجيني. لازم ما اضعف جدامهم عشان ما يضعفون: هههه انا اكثرهم هشاشه من داخل و اقول هالكلام! شئ مضحك.

دخلت باب المدرسه و مشيت لي الساحه, شافني عبدالله و عطاني هذيك النظره المنكسره.

عبدالله: وينك تأخرت حسبتك بتغيب, نرا حمني كان برا الديره و توه الفجر يالله درى.

جاوبته:ما بغيب, ما صدقت قدرت اطلع من البيت خطر علي اني اظل لحالي بافكاري المشؤومه و ما ودي اترككم لحالكم ادري تحتاجوني بقدر حاجتي لكم, الي فقدناه مو اي انسان احمد ماكان شويه. 

حمني اشلونه ؟ منهار؟ كان حيل متعلق باحمد.

جا حمني ناحيتنا بعد ما دخل اسوار المدرسه و عيونه و خشمه و خدوده حمر من البجي و الجو بارد زود السالفه سوئ. شعره مو مرتب ولا ممشط و الفنيله صيفيه مو شتويه و البنطرون تبع المدرسه الخاصه مال اخوه,  شكله من هول الخبر خربط باللبس.

وصل عندنا و وقف قبالي و وراي كان عبدالله, تلني من كم ايدي و مسك ايد عبدالله و رحنا للساحه الخلفيه. و احنا نمشي كان  حمني يشاهق و مدنق راسه.

حمني و صوت شهقاته بدا يعلي: قول انه مو صج تكفا قول انه جذب, قول انه مقلب من مقالبه الغبيه اهو مقلب صح.

وقف فجأه و جرني من قميصي و حط راسه على صدري و اهو شاد قبضته على قميصي و يبجي: مو احمد اي احد الا احمد.

رجليه وهنو من تعب البكي و بغا يطيح بس مسكته, راسه متنكس و دموعه لامست الارض و اهو يتنهد. الساحه الي يسمونها ساحه المسجد محد يروح لها غيرنا و كم ادمي, بس اليوم جنه يدرون بحالنا فخلونا لحالنا نواسي بعض.

هد قميصي و قعد على اطراف رجوله, نزلت للارض حوطت ايديني على اكتافه  احاول اهديه, جا عبدالله و قومه و طلع كلينكس من جيبه و مسح وجه حمني: مات احمد و بعدين؟ بموت وراه و دوتس و امك و ابوك و اخوانك و اختك الخبله هدى و اخوك الخبل روبن الي لابس ملابسه و بنت خالتك هديل و ولد خالتك ادم و القطوه الي بالشارع  و جلب جيرانكم و الهندي الي يسوي لك فلافل و انت معانا, بس هذا معناته خلاص game over  ؟ ولا في راوند ثاني بلا نهايه عند رب العالمين اسمه ابديه؟ شنو انت ما تبي تشوفه بالجنه؟ ليه تسوي بنفسك جذي جنك تعترض على حكم الله؟ الملك قال كلمته بقبض روحه انت منو, انت شنو عشان تعترض؟ افرح له لانه راح عند ربه و قريب كلنا بنلقاه فوق.

ادري ان عبدالله يمثل انه القوي المؤمن و يقول كلام عشان يواسي نفسه و يواسينا, كلامه كان حلو, بس مو كفيل بانه يطفي نار قلبونا المحترقه, آمنت بالله, بس شعور الخساره لا بد منه هذا احمد ماهو الهندي بو فلافل. مسكت وجه حمني بايديني و طالعت بعيونه و دموعي خانتني و قامت تنزل: حمني تبي تقول لي انك تحب احمد اكثر مننا؟  ليش مو رفيجنا بعد؟ تحاسبنا محنا حزنانين مثلك؟ ولا تنسابق منو يحزن اكثر يفوز؟ تحاسبنا مو حاسين بشئ يعتصر قلوبنا؟ ترا كلنا عايشين قوه بدونه (عايشين غصب) اعرف انت شتحس فيه و اعرف الي يحس فيه عبدالله و احنا موجودين لبعض, مو انت الي دايم ترسم اختام بكتبنا عشان تحمينا و توحدنا على قولتك انت و خرافاتك.

حمني بوجه كله دموع و اشياء اخرى: اهئ اهئ.. مو خرابييط هذا صج جوف احنا شلون متماسكين الحين بفضل اختامييي.

شكله و اهو يتكلم و اهو يبجي كان مضحك جتني الضحكه بهالموقف الخايس. دخلت ايدي لجيب عبدالله طلعت كلينكس و نظفت وجه حمني. طق الجرس و بدأ الاختبار. اسبوع الاختبارات مر و الوتيره رتيبه ابيها تخلص بسرعه بس مادري شنو بيجي وراها. طلعت النتايج و كان لازم اسمه مع اسامينا خريجين دفعه هالسنه من الثنوي. بدأ الكورس الثاني و حده كئيب, زعيم المقالب راح فمحد يقدر ياخذ مكانه و محد له مزاج و الكل انشغل بالحياه. حمني مدرسين خصوصين كل يومين عبدالله مثلي ما يرتاح بالدراسه الا لمن يقفل على نفسه يومين ثلاث و يقابل كتبه, قل احتكاكنا ببعض و حتى بالفرص لمن نقعد كل الي نسولف عنه اختبارات و كل ما سمعنا اسم "احمد" بمحاوره بين الشباب بالمدرسه قلوبنا تنغزنا و نذكر بعض بمواقفنا و مقالبنا عقبها يرد يخيم الصمت.

 جات اختبارات الفاينل اول اختبار و جانا حمني من مادري وين جنه كان متعلق على شجره و نط فجأه: شباااب شوفو شسويت لنا

عبدالله:  بسم الله من وين طلعت انت !! ما تيوز عن سوالفك جنك قرد

كشر حمني و ابتسامته شاقه الوجه.

:شسويت؟ مذكرات ؟ تلاخيص؟

:براشيم؟ نسخه من الاختبار؟ فضيحه لمدرس عشان تجبره يعطينا درجه نهائيه؟

:اشفيه مصطفى يبي برشامه؟

:لا يا حظي, سويت اساور

:يا فرحه امك بيك سويت شنو!!

:لا جب اسكت و اسمع, اساور هذه كلنا لازم نلبسها عشان تربطنا و شوفو حطيت الختم عليها "صوره راس قرد مسوي حبتين و يمه طبعه قلب, داخل دائره مثبته بسلسله عالسوار"

:تبيني البس هذه عشان الاشاعات عني تزداد قوه و ضراوه XD   ولك امي مو بتعلقني من رجولي بالبنكه " المروحه" , مع هالسواره راح تجيب لي شيخ و يمردغني و يفلعني بالخيزرانه و يصارخ اطلع ايه الجن الازرق!! سو نو ثانكيو.

اوافق دوتس الراي, يا تجيب شئ سنع او اقلب خشتك.

عيونه قامت تتلألأ عشان يترجانا و اخر شئ استسلمنا للامر الواقع و اخذناهم, قمت افكر اشلون اظل لابسها بدون ما تشوفها امي او ينتبه لها ابوي.

حمني: الحين اقدر اكون مرتاح ان الكورس الي فات ماراح يتكرر. ترا وحشتوني يا حمير.

جب ولا لأضربنك ضربه التيس, اي والله مغير محزنين جننا عراقيه و لقت عزا تشبع فيه لطم 

دوتس نسيت خوال امك فيهم عرج عراقي

كل الديره بلا استثناء فيهم عرج بس مو معناته لا اقول الصدق, يبون ظيم عشان يشبعون لطم XD

الشئ الغريب ان محد عنده هالظاهره غير العرب لمن يمرون بشئ سيء جدا تقوم الانثى باللطم و الولوله

ما بينت الكيفيه, تقوم الانثى التي تكون بالعاده كالفيل بالظرب على الخدين و الصدر و تقول اشجابني للظيم جنت مدلله و غيرها من المقولات الشائعه بين الاناث و الحريم بصفه خاصه

نشكر المراسل دوتس على التقرير المفصل XD   امها من سالفه ما لقينا نسولف غير عن اللطم!!

اخييه عليكم والله وحشتني هالسوالف السخيفه معاكم

انا سخيف ايه القرد الاجرب؟؟ لأضربن عنقك

ضحكنا و لبسنا الاساور و طلع حمني تلفونه الي مهربه عشان يصور ايدينا و احنا لابسينهم و مسوين حبتين. خلصت فتره الاختبارات و حمني قلب لكل الديانات يدعو الله و المسيح و يسوع و بوذا و مادري منو عشان ما يطيح دور ثاني. طلعت النتايج و بدت ملاهي الحياه تشغلنا .. تعرفون انتو.. الكليه و التسجيل و الجداول و المواد وين نروح شنسوي كل يوم رايحين كليه كل يوم زياره لمكان وقتنا صار جدا ضيق.

سبحان الله الانشغال ينسي الواحد همومه,و الدنيا ما توقف على موت انسان.

 فاقدينه بس الوقت اضيق من اننا ننتحب مثل البنات و خلاص بكينا مكنون قلبنا.

Life goes on

شكرا لكل من قرأ و سبيشل ثانكس قوز تو جو تشان و طماطم *^* 
صحيح ان القصه لنفسي,  بس رائيكم مرغوب به .. ^^